苹果日报 左丁山2007-04-26GG细语 写遗嘱

苹果日报 左丁山2007-04-26GG细语 写遗嘱

香港有几多人叫做Tony Chan？姓陈嘅人非常多，三十几岁以上嘅男士以Tony为名者亦不少，姓陈而叫做Tony，相信起码有几万人啩？

神秘人身份曝光，有相片为证。一位老师Tony Chan上课嘅时候，畀学生开玩笑：「陈Sir，你系Tony Chan噃，有成千亿身家，仲使乜教书呀？」呢位陈Sir只能苦笑：「可惜我只识艺术，唔识风水呢，入错行，读错书咯。」艺术与玄学，同样难读，不过主修後者，原来回报高到不得了。

千亿遗产如何分配，尚未可知，但争产官司就几乎一定有，信托Ｃ喺银行做信托（trust），对遗嘱十分熟悉，佢认为小甜甜○六年十月嗰份英文遗嘱如果加上两行，例如：「这是我最後的遗嘱，我谨此撤消以前订立的任何遗嘱，并决定以下列方法分配我的遗产：」，就会清楚好多，上到法庭冇得拗，依家就唔敢讲咯。投资Ｌ以前系律师，佢话：「写遗嘱有好多样本啫，小甜甜两份遗嘱，一中一英，唔掂喎。正规遗嘱上几乎每一字眼都有法律含义，经过几百年嘅审讯考验，凡律师都识o架。」

人哋嘅遗嘱，关我哋乜事吖，投资Ｌ话决定有生之年，使晒啲钱，不留下任何遗产。信托Ｃ话遗嘱有唔少款式，一位富豪有先见之明，喺遗嘱内加入一个条款，声言任何遗产受益人如有不服分配方法，发动争产官司嘅话，就斗零都冇得分。当然，若任何一位受益人不服，系可以打官司嘅，但佢要计吓条数，如果官司赢咗，佢可以有好多着数，但如果万一输咗，就会乜都冇晒，何况打官司又需要一大笔律师费……结果人人都服，家庭安静。

一位仁兄在结婚前写下遗嘱，分配好晒家产。殊不知，咁样阻止唔到太太嘅，因为婚前遗嘱在结婚後就失效，如果唔想太太分晒身家，唔该订下一份结婚协议书！投资Ｌ话：「生前就为死後伤尽脑筋，要咁多钱做乜吖。」唉，唔伤脑筋都唔得啦，厂家Ｂ成六十岁，大仔已经读完硕士，点知厂家Ｃ一时失手，喺东莞嘅「爱人」为佢生多一名，只有六个月大，唔写好遗嘱？第日一定家庭吵闹。